WHERE DO YOU WANT TO BAT?

WHERE DO YOU WANT TO BAT?

- Kamliana KL

Kum 2003 Cricket World Cup khelh tan a nih hma lawk, kum 2002 kum tawp leh kum 2003 World Cup intan dawn thlengin Indian Cricket team chu batting position (Batting order) -ah harsatna neuh neuh an tawk a; a chhan pawh khatih hun laia an thiampuipa, Indian Cricket fans tam takin “GOD” , “God of Cricket” ti hiala hming an vuahsak Sachin Tendulkar inhliam vang a ni.

Sachin-a hi Indian Opener hlawhtling ber leh ropui ber a ni a; khatih hun lai pawh khan Opener zingah amah deuh chiah kha thlak theih loh anga an ngaih a ni; a Opener partner-puite erawh an chet that loh chuan an thlak kual reng zel. Chutia Sachin-a a inhliam takah chuan a aiawh tur dahin, India team batting position kha an inthlak kual ta sup sup a, Sourav Ganguly, Virender Sehwag, Rahul Dravid, etc etc., Sachin-a tel lo pawha team tha ber ni thei tura team siamrem kha Coach leh management te tum ber chu a ni. No. 3 position-a khel te kha Opener-ah an sawn chho a, chutiangin no. 4 kha no 6 -ah te an tlak thlaktir a; an insiksawi nasa hle. Khatih lai khan Indian team pawh an che fuh hleithei lo.

Kum 2003 World Cup South Africa -a khel turin ram hrang hrang Cricket team te an inbuatsaih mup mup a, Sachin Tendulkar pawh a hliam dam chho zelin, ngai a rawn awh chho leh ta a. Mahse, a awm loh chhung khan Indian team khan Batting position an lo ‘change’ nasat avang leh tha ber nia an ngaihah (Strongest position) anga an ngaihah an khelh avangin Sachin-a chu Opener-a khelhtir ta lo chuan No. 4 position-ah (chu chu mi 2 an out hnu-a lut tur) an dah ta a; Sachin-a pawhin harsatna nei lem lo leh sawisel lem loin a khel ve mai a; mahse, India team chu an combination a fuh hleithei ta lo, World Cup tan nan kar khat pawh a awm tawh si lo, warm-up match an khel tan tawh si, India coach – John Wright pawh a rilru a buai hle.

A ni tak a, Sachin hi mi inngaitlawm tak, mahni personal record leh stats aia team performance dah pawimawh hmasa mi a ni a; “Run 100 (Century) siam mah ila, a tawpah kan team kan chak leh si loh chuan ka hlim lo ang. Run 10 lek pawh siam ila, kan team kan chak chuan ka lawm zawk. Century siam a, team chak bawk tluka lawmawm erawh a awm lo,” a lo ti reng bawk a ni.

Chutia an team combination fuh hleithei lo, batting order fuh thei lo chu an coach John Wright chuan pawi a ti a, mimal tak pawha experience ngah leh senior a nihna angin Sachin-a chu a ko fal ta a. An coach chuan Sachin-a hnenah, “Where do you want to bat?” tiin a zawt a. Sachin-a chuan, “Team-in min mamawhna apiang leh kan that theihna ber turah chuan eng position-ah pawh bat ila, pawi ka ti lo,” tiin an coach chu a lo chhang a. (Sachin-a rilru-ah chuan he chhanna hi a duhthusam ber chu a ni lo ang; mahse, coach leh teammate te a hmaizah vangin polite takin a chhang mai niin a lang.). An Coach chuan zawt nawn lehin, i ngaihdan analyse mai mai leh tha ber nia i rin sawi turin ka ti lo che a, a khawi lai batting position berah nge batting i duh tih ka zawt zawk che a ni a ti leh a (Which position do you want to bat at?). Chutah zet chuan Sachin-a chuan, “Team thatna ber hi ka duhna a ni zel a, khelh thiam tumin insiamrem ka tum mai zel; mahse, keima batting duhna ber min thlantir dawn chuan opener hi ka bat duh berna a ni e,” tiin a chhang a. Chuta tang chuan Cricket a chawlhsan thleng 2012 (ODI) khan mi 100 chuang cricket Indian team-ah player thar lo lutin, an chhuak bawk a, batting Position pawh inthlak kual mah se, Sachin-a chu Opener-ah a khel ta char char a ni. 2003 World Cup-ah khan India khan Final-ah Australia an hneh zo lo tih loh chu game dangah an chak vek a; Sachin hliam damkawr, mi tam zawkin World cup pawh khel thei lo tur leh warm up match pawha che chhe em em, sawisel hlawh, Sachina aia player thar Squad-a telh zawk tur hiala nawrna a awm kha, World cup runner-up niin Sachin chuan World cup (single edition) -a run siam hnem ber record a siam hial a ni, a record (Runs 673) chu tun thlengin khum thei an la awm rih lo a ni.

Team/Pawl anga kan thawh honaah hian a chang chuan kan thatna ber, kan chakna leh kan theihna contribute theih lohna position-ah hian kan ding fo thin. Kan thawhpuite kan hmaizah vang te, Mizo tlawmngaihna kan neih vang te, aia upate kan zah vang leh kawng hrang hrangte avangin.. thiante leh thawhpuiten min hûnna zâwn, min dahna hmun, chanvo min pekna hmun, OB post min pekna hmun, Committee member min pekna hmun, etc. apiang hi kan thatna ber emaw, kan team chakna ber tur emaw, kan pawl that tlanna ber tur emaw kan ti fo thin. Chak angin, thatpui angin lang mah ila, kan duhna ber leh kan thiamna ber position-ah hian min dah phei se’ng chuan, hei ai hian kan kohhran, kan pawl leh kan team hi kan that phah zawk lo vang maw tih ngaihtuahnaah a lo lang rum rum thin em?

Pawl anga kan thawh honaah chuan kan teammate te, kan leader te, kan advisor-te leh kan thawhpuite kan zahin an thu kan ngaichang tur chu a ni nameuh mai. Amaherawhchu, team thatna leh hmasawnna, pawl thatna leh hmasawnna duh tak tak, mi thahnemngai tak tak tan chuan kan thatna bera thawh thiam emaw, thawh theih emaw hi a lo tha dawn hle mai. Chutianga kan talent, kan strong leh weak point te hre chiang a, zir chiang a, pawl thatna atana remkhawm thiam, an chakna position theuha dah khawm thiam, kan chakna leh thiamna ber min haichhuahsak theitu tur leader tha, hruaitu tha leh thawhpui tha kan mamawh hle a ni.

Mizo-pa pakhat, sap rama awm pawh kha tum kha chu a che fuh lo pek alawm maw le. An thianzaho chaw eikhawmnaah artui an rawn sem a, ani Mizopa tih takah tlawmngaih tawngkam mawi lo chhuahin, “Ka duh lo mai ang” a lo ti a. Sapho chuan Zo tlawmngaihna hrethiam hek lo, “He pa hian artui a ei ngai lo a nih dawn hi,” tiin a lehpeka chaw eikhawmnaah phei chuan artui reng reng chu an pe duh ta lo a, ti fuh a inti lo hle! Khawvel hi a thang chho zel a, Mizo ka ni tiin inla-Mizo eng ang mah ila, Hnam changkang leh ram changkang zawkte hi kan ngaisangin an tih dan pawh kawng eng emaw chenah chuan kan copy zel dawn. Westernised/Computerised khawvela kan chen avangin kan rilru sukthlek leh kan ngaihdan te pawh kan ram zimtê bial ni loin, khawvel pum huap rilru zau kan nei a tul tawh a ni; Mizo tlawmngaihna leh nunze mawi thlauhthlak tur tihna erawh a ni lo ang.

Kan kohhranah, khawtlangah, pawlah hian nihna hrang hrang, portfolio leh duty hrang hrang kan inpe thin a; inthlangin kan inruat bawk a. Nihna kan inpek/inthlan dawn te hian chu pa chu, chu nu chu eng ang mi nge? Eng nge a tuina? Eng post-ah hian nge dah ila pawl tan tha ber ang? Engah hian nge awm se that hmel deuha lang, pawl chhiatna ni thei zawk ang? Etc etc te hi ngaihtuah chian hmasak a ngai hle a ni. India coach John Wright-an Sachina a rinngamzia leh a chunga beiseina a neih ang hian kan hruaitu leh senior zawkte pawh hian theihna nei, mi beiseiawm nia kan hriatte thur chhuakin an chungah rinna nghat ngam ila. Mi pakhat chu pawl tan khawiah pawh awm se, ani hi chu a tha vel vek ang ti mai loin, an thatna ber, an tuina ber, an strong position zawt chhuak thinin chutiang vek chuan kan nauteho chherchhuak zel ila, eng pawl pawh ni se, eng kohhran pawh ni se, chu pawl chu pawl chak tak, thangduang tak, inngeih leh hmasawn tak an ni ngei ngei ang.

Dt. 25.09.2020 (10:00 a.m. vela ka ziah a ni.)